దుబ్బాక ఉప ఎన్నికలబరిలో కత్తి కార్తీక

ఎన్టీఆర్ హోస్ట్ చేసిన బిగ్ బాస్ సీజన్ 1లో కంటెస్టెంట్‌గా తెలంగాణ యాసతో అలరించిన బ్యూటీ కత్తి కార్తీక. వీ 6 ఛానల్‌లో ‘దిల్ సే కార్తీక’ కార్యక్రమంతో ఫేమస్ అయిన కత్తి కార్తీక.. బిగ్ బాస్ షోతో పాపులారిటీ దక్కించుకుoది. తాజాగా కార్తీక దుబ్బాక ఉప ఎన్నికల సంగ్రామంలో కత్తి దూసేందుకు రెడీ అయ్యింది.

సిద్దిపేట జిల్లా దుబ్బాక నియోజవర్గ ఎమ్మెల్యే రామలింగారెడ్డి చనిపోవడంతో ఆ స్థానానికి ఉప ఎన్నిక జరగనున్న సంగతి తెలిసిందే. నాలుగు సార్లు శాసనసభ్యుడిగా గెలుస్తూ వచ్చిన రామ లింగారెడ్డి.. సీఎం కేసీఆర్‌కు అత్యంత సన్నిహితుడుగా మెలిగారు. ఆయన మరణం తరువాత రామలింగారెడ్డి కుటుంబసభ్యుల్లో ఒకరు పోటీ చేసే అవకాశం ఉండగా.. బీజేపీ తరపున గతంలో ఇక్కడ నుంచి పోటీ చేసిన రఘునందన్ రావు బరిలో ఉండనున్నారు. అయితే ఈ స్థానాన్ని ఎలాగైనా సొంతం చేసుకోవాలని కాంగ్రెస్ పార్టీ ప్రయత్నంలో భాగంగా ఫైర్ బ్రాండ్‌గా గతంలో మెదక్ ఎంపీగా వ్యవహరించిన విజయశాంతిని దుబ్బాక ఉప ఎన్నికల బరిలోకి దింపితే ఎలా ఉంటుందనే ఆలోచన కాంగ్రెస్ వర్గాల్లో ఉన్నట్టు ప్రచారం బాగా సాగుతోంది. ఇంత పోటీ లోనూ ఈ బై పోల్ వార్‌లో నేను సైతం అంటోంది కత్తి కార్తీక.

ఈ ఉపఎన్నికల్లో భాగంగా స్పీచ్‌లతో అదరగొట్టేస్తోంది కత్తి కార్తీక. ఆమె మాట్లాడుతూ.. దుబ్బాక ఉప ఎన్నికల్లో నేను పోటీ చేస్తున్నాను.. బహుజన ఆడబిడ్డ నన్ను ఆదరించండి.. నాకు ఓటేయండి.. ఈ నియోజకవర్గానికి సర్వీస్ చేయాలనే నేను రాజకీయాల్లోకి వచ్చాను. నిరుద్యోగిత అనేది ఇక్కడ ప్రధాన సమస్యగా ఉంది. నేను లండన్‌లో ఆర్కిటెక్చర్ చదువుకుని ఇక్కడకు వచ్చా.. ఒక ఊరిని అందంగా ఎలా తీర్చిదిద్దొచ్చు అనే ఐడియా నాకు ఉంది. సెల్ఫ్ ఎంప్లాయిమెంట్ క్రియేట్ చేయడానికి నా వద్ద కొన్ని ఐడియాలు ఉన్నాయి. అందర్నీ కలుపుకుని వాళ్లకు ఏమి అవసరమో గుర్తించి వాటికి అనుగుణంగా మానిఫేస్టో తయారుచేసి వాటిని చేస్తామని హామీ ఇస్తున్నాను. ఇక్కడ ఎవరికీ కూడా ఉండటానికి ఇళ్లు లేవు. నేను గెలిస్తే తప్పుకుండా ప్రతి ఒక్కరికీ ఇళ్లు ఇప్పిస్తా. ఆ బాధ్యత నాది. దుబ్బాకలో చాలా సదుపాయాలు లేవు. మీ అందరికీ ఇళ్లు కట్టించిన తరువాతనే దుబ్బాకలో నేను ఇళ్లు కొంటా అని ప్రమాణం చేస్తున్నా.. మీ సేవకురాలిగా నేను పనిచేస్తా’ అంటూ రియల్ పొలిటీషియన్ మాదిరే స్పీచ్‌తో దంచికొట్టింది కత్తి కార్తీక.