విక్రమ్ కుమార్ హారర్ వెబ్ సిరీస్ లో చైతూ!

విక్రమ్ కుమార్ కి .. రాఘవేంద్రరావుకి ఒక విషయంలో చాలా దగ్గర లక్షణం కనిపిస్తుంది. ఇద్దరూ కూడా తమ సినిమాల గురించి ఎక్కువగా మాట్లాడరు. తమ సినిమా సంచలన విజయం సాధించినా పెద్దగా హడావిడి చేయకుండా తరువాత సినిమా చేసుకుంటూ వెళుతుంటారు. ఇద్దరూ ఎంచుకునే కథలు .. టేకింగ్ మాత్రం భిన్నంగా ఉంటాయి.

ప్రస్తుతం విక్రమ్ కుమార్ .. చైతూ కథానాయకుడిగా ‘థ్యాంక్యూ’ సినిమా చేస్తున్నాడు. ఈ సినిమా ఇప్పటికే చాలా వరకూ చిత్రీకరణ జరుపుకుంది. ఈ సినిమా తరువాత చైతూతో ఆయన ఒక వెబ్ సిరీస్ చేయనున్నట్టు తెలుస్తోంది. ఈ ఏడాదిలోనే ఈ వెబ్ సిరీస్ పట్టాలెక్కుతుందని అంటున్నారు. ఇది హారర్ నేపథ్యంలో సాగే వెబ్ సిరీస్ కావడమే అసలు విషయం.

హారర్ కథలను హ్యాండిల్ చేయడంలో విక్రమ్ కుమార్ చేయితిరిగినవాడే. తమిళంలో ఆయన చేసిన హారర్ థ్రిల్లర్ ’13 B’ వివిధ భాషల్లో విజయవంతమైంది. మాధవన్ కెరియర్లోనే ప్రత్యేక చిత్రంగా నిలిచింది. తనకి హారర్ సినిమాలంటే భయమన్న చైతూ, ఈ వెబ్ సిరీస్ లో ఎలా చేస్తాడో చూడాలి.