హైదరాబాద్‌ ప్రజలకు న్యూఇయర్‌ గిఫ్ట్‌.. నీటి బిల్లు రద్దు
ముఖ్యమంత్రి కేసీఆర్‌ హైదరాబాదీలకు న్యూఇయర్‌ గిఫ్ట్‌ ఇవ్వనున్నారు. 20 వేల లీటర్లలోపు నీటి వినియోగానికి సంబంధించి జనవరి నుంచి బిల్లులను రద్దు చేయాలని నిర్ణయించారు. ముఖ్యమంత్రి కేసీఆర్‌ ఆదేశాల మేరకు హైదరాబాద్‌ నగర ప్రజలకు ఉచిత తాగునీటి సరఫరా ప్రయోజనాన్ని జనవరి మొదటి వారం నుంచి కల్పించనున్నట్టు పురపాలక, ఐటీశాఖల మంత్రి కే తారకరామారావు వెల్లడించారు. ఇందుకు సంబంధించి రెండ్రోజుల్లో విధి విధానాలను సిద్ధంచేయాలని అధికారులను ఆదేశించారు. ఈ మేరకు కార్యక్రమాన్ని ప్రారంభించేందుకు అవసరమైన చర్యలు తీసుకుంటున్నట్లు చెప్పారు. నగరంలో ఉన్న మొత్తం నాలా కనెక్షన్లు, నీటి సరఫరాకు అవసరమైన ఏర్పాట్లు, కార్యక్రమ విధివిధానాల రూపకల్పనపై రాష్ట్ర ప్రభుత్వ ప్రధాన కార్యదర్శి సోమేశ్‌ కుమార్, జలమండలి అధికారులతో ప్రగతిభవన్‌లో కేటీఆర్ సమీక్షించారు.