ఆగస్ట్ నెలకు తిరుమల దర్శన టికెట్ల విడుదల

ఆగస్ట్ నెలకు గాను తిరుమల శ్రీవారి దర్శన టికెట్లను టీటీడీ విడుదల చేసింది. రూ. 300 విలువ చేసే టికెట్లను ఆన్ లైన్లో ఉంచింది. కరోనా నేపథ్యంలో రోజుకు 5 వేల టికెట్లను మాత్రమే అధికారులు అందుబాటులో ఉంచారు. ఈ ఉదయం 9 గంటలకు టికెట్లను ఆన్ లైన్ లో ఉంచడంతో… భక్తులు ఒక్కసారిగా అధిక సంఖ్యలో టికెట్ల కోసం ప్రయత్నించారు.

దీంతో, టీటీడీ వెబ్ సైట్ సర్వర్ డౌన్ అయింది. కాసేపు వెబ్ సైట్లో టికెట్లు కనిపించలేదు. దీంతో టికెట్ల కోసం ప్రయత్నిస్తున్న భక్తులు అయోమయానికి గురయ్యారు. ఆ తర్వాత కాసేపటికి వెబ్ సైట్ ఇబ్బందులు లేకుండా పనిచేసింది. ఆగస్ట్ నెల అకామడేషన్ కు సంబంధించిన స్లాట్ బుకింగ్స్ ఈ మధ్యాహ్నం 3 గంటలకు ప్రారంభంకానున్నాయి. శ్రీవారి దర్శనానికి వచ్చేవారు కోవిడ్ నిబంధనలను పాటించాలని టీటీడీ కోరింది.