నాగార్జున ‘వైల్డ్ డాగ్’ ట్రైలర్ రిలీజ్ చేసిన చిరంజీవి

గతంలో  హైదరాబాద్ ను వణికించిన గోకుల్ చాట్ పేలుళ్లు, ఇతర ఉగ్రవాద ఘటనల ఆధారంగా తెరకెక్కించిన చిత్రం ‘వైల్డ్ డాగ్’. టాలీవుడ్ కింగ్ నాగార్జున ఎన్ఐఏ ఆఫీసర్  విజయవర్మ పాత్రలో కనిపిస్తున్నారు. కాగా ఈ చిత్రం ట్రైలర్ ను మెగాస్టార్ చిరంజీవి విడుదల చేశారు. ఈ సందర్భంగా ఆయన స్పందిస్తూ, ‘నా సోదరుడు నాగ్ ఎప్పటిలాగానే కూల్ గా, ఎనర్జిటిక్ గా కనిపిస్తున్నాడు’ అంటూ కితాబునిచ్చారు. ఏ జానర్ లో ప్రయత్నించేందుకైనా నాగ్ వెనుకాడడని ప్రశంసించారు. ఈ సినిమా విజయవంతం కావాలని ఆశిస్తున్నట్టు తెలిపారు.

ఓ కంప్లీట్ యాక్షన్ మూవీకి ఉండాల్సిన కంటెంట్ వైల్డ్ డాగ్ లో ఉందని ఈ ట్రైలర్ చెబుతోంది. నూతన దర్శకుడు అహిషోర్ సాల్మన్ డైరెక్షన్ లో వస్తున్న ఈ చిత్రంలో సయామీ ఖేర్, అలీ రెజా, ప్రకాశ్ సుదర్శన్ తదితరులు ముఖ్య పాత్రల్లో కనిపించనున్నారు. మ్యాట్నీ ఎంటర్టయిన్ మెంట్ బ్యానర్ పై నిరంజన్ రెడ్డి, అన్వేష్ రెడ్డి ‘వైల్డ్ డాగ్’ చిత్రాన్ని నిర్మించారు. ఈ చిత్రం ఏప్రిల్ 2న విడుదల కానుంది.

వాస్తవానికి ఈ సినిమాను కరోనా ప్రభావాన్ని దృష్టిలో ఉంచుకుని ఓటీటీ వేదికలపై రిలీజ్ చేయాలని చిత్ర నిర్మాతలు భావించారు. అయితే, థియేటర్లలో పూర్తి సామర్థ్యం మేరకు ప్రేక్షకులను అనుమతిస్తూ కేంద్రం నిర్ణయం తీసుకోవడంతో థియేట్రికల్ రిలీజ్ చేయాలని చిత్రబృందం నిర్ణయించింది.